atlanTTic colabora no proxecto europeo EWOC para mellorar as redes 5G

Un grupo de investigadores do Centro de Investigación en Tecnoloxías de Telecomunicación da Universidade de Vigo, atlanTTic, que pertence á Rede CIGUS – unha iniciativa promovida pola Xunta de Galicia que aglutina os centros do sistema que acreditaron a súa excelencia científica-, participa no proxecto internacional EWOC (Enabling Virtualized Wireless and Optical Coexistence for 5G and Beyond).

O propósito principal deste proxecto, financiado polo programa Horizon Europe-MSCA-DN (Marie Skłodowska-Curie Actions) con 2,3 millóns de euros, é avanzar na optimización destas redes para conseguir que sexan máis rápidas, eficientes e fáciles de usar. “EWOC busca desenvolver unha nova solución de rede óptica e sen fíos, flexible e virtualizada, para optimizar os recursos das redes 5G e posteriores (B5G), aumentando de xeito significativo a eficiencia espectral”, sinala Felipe Gil Castiñeira, investigador de atlanTTic e docente da Escola de Enxeñaría de Telecomunicación, quen coordina o proxecto na UVigo.

O pasado mes de febreiro celebrouse a oitava xornada plenaria do consorcio, unha reunión das entidades socias para analizar o progreso e definir os seguintes pasos do proxecto coordinado polo Instituto de Telecomunicações. Xunto a atlanTTic participan unha decena de socios: Universitat Politècnica de Catalunya; Politécnico de Torino; Technische Universität Dresden; University of South Wales e as empresas Huawei Sweden, YLO-Verkot, Top-IX e ISRD, de nove países: Portugal, España, Italia, Alemaña, Reino Unido, Suecia, Finlandia, Polonia e Francia.