Carlos Salgado, director do IGFAE, elixido vicedirector do Centro Nacional de Física de Partículas

Carlos Salgado, director do IGFAE | Imaxe: Elena Moura

Carlos Salgado, director do Instituto Galego de Física de Altas Enerxías (IGFAE), centro mixto da Universidade de Santiago de Compostela e da Xunta de Galicia e membro da Rede CIGUS, foi nomeado vicedirector do Centro Nacional de Física de Partículas, Astropartículas e Nuclear (CPAN). Trátase dunha agrupación científica, creada no marco CONSOLIDER-Enxeño 2010, cuxo obxecto fundamental é establecer un marco de colaboración estable entre as institucións asinantes no campo da investigación, innovación e desenvolvemento tecnolóxico en física de partículas, astropartículas e nuclear. A renovación do equipo de dirección completouse coa designación como directora da investigadora do CSIC no Instituto de Física Corpuscular (IFIC) María José Costa.

Carlos A. Salgado é físico teórico, profesor na Universidade de Santiago de Compostela e director do IGFAE, así como director científico da correspondente Unidade de Excelencia María de Maeztu entre 2017-2021. Durante os dous últimos anos tamén foi membro do Comité Executivo do CPAN, representando a área de Física Teórica.

O labor investigador de Salgado céntrase no campo de estudo da Cromodinámica Cuántica (QCD) en condicións de altas densidades ou temperaturas, así como as distribucións partónicas nucleares. Os seus últimos traballos concéntranse na investigación da coherencia cuántica da cor dentro de dous jets de QCD, que son chorros de partículas de altas enerxías orixinados pola radiación de quarks e gluóns, e no uso desta información para determinar os procesos máis rápidos de termalización que observamos na natureza.

Salgado recibiu dous proxectos do European Research Council: Hot and dense QCD in the LHC era (Starting Grant – Consolidator steam E2012-2017) e Yoctosecond imaging of QCD collectivity using jet observables (Advanced Grant 2019-2025).