CiQUS

Os progresos na química de superficies e as técnicas de caracterización permitiron recentemente obter imaxes directas de intermediarios de reacción, incluso no ámbito de moléculas individuais. O equipo do proxecto MolDAM, financiado con fondos europeos, utiliza a microscopia de efecto túnel para manipular a carga dos electróns dentro das moléculas e controlar a súa reactividade. No proxecto combínanse coñecementos técnicos da síntese en solución de moléculas orgánicas específicas, a química de superficies, a manipulación de átomos e as técnicas de caracterización de molécula única. Espérase que o traballo do proxecto revele unha gran cantidade de información sobre novos tipos de reactividade química. Mediante o uso de pulsos ultrarrápidos, os investigadores desentrañarán os mecanismos de transformación molecular cunha resolución espazo-temporal sen precedentes.

Referencia: ERC-2020-SyG-951519

Ir á páxina do proxecto

O metano, o compoñente principal do gas natural, utilízase sobre todo como combustible, pero tamén pode converterse nun material excepcional para o seu uso en síntese orgánica como axente metilante. Non obstante, o metano presenta unha reactividade moi baixa, o que limita a súa utilización. A estratexia principal que segue o proxecto BECAME para aumentar a reactividade deste gas baséase en utilizar metais de transición para activar os enlaces de carbono e hidróxeno en combinación con outros que catalizan o proceso de metilación. Os investigadores de BECAME confían en que o método proposto desvele información sobre reaccións de acoplamento cruzado catalíticas e a activación do carbono e do hidróxeno, e que sirva como base fundamental para a funcionalización sostible e eficaz do metano.

Referencia: ERC-2019-CoG-863914

Ir á páxina do proxecto

Os cancros de pulmón, mama, colon e páncreas provocan a morte de aproximadamente tres millóns de persoas ao ano, o que representa máis do 40 % de todas as mortes por cancro do mundo. Moitas quimioterapias para tratar estes cancros baséanse en fármacos citotóxicos e non eliminan as células nai cancerosas (CSC, polas súas siglas en inglés), unha pequena poboación de células tumorais que son as principais responsables da quimiorresistencia e a recidiva da enfermidade. Ata agora, existen moi poucas terapias antiCSC, en parte debido á plasticidade inherente destas células.

Os investigadores deste proxecto identificaron compostos químicos que son capaces de dirixirse especificamente á respiración mitocondrial nas CSC e, polo tanto, poderían evitar a resistencia ao tratamento mediada por CSC e a recidiva.

Os resultados nas CSC pancreáticas e en modelos preclínicos derivados de pacientes demostran unha actividade anticancerosa potente. É importante destacar que os estudos in vivo suxiren unha toxicidade secundaria asociada baixa. Co apoio de CaixaResearch, este equipo multidisciplinar validará a tecnoloxía en modelos preclínicos de diferentes tumores xerados por CSC e desenvolverá un plan de comercialización para facilitar o seu acceso ao mercado.

Institución financiadora: La Caixa Research Consolidate 2021

Ir á páxina do proxecto

Un dos obxectivos máis importantes da nanomedicina é a aplicación de nanopartículas para a administración de fármacos e para o diagnóstico clínico. O proxecto SPACING, financiado con fondos europeos, pretende desenvolver unha tecnoloxía innovadora para deseñar nanopartículas con configuracións de ligandos similares a cápsides virais, co fin de que poidan ofrecer prestacións similares no ámbito do transporte e estabilidade en lisosomas. A tecnoloxía de SPACING, ademais, permitirá impulsar as estratexias actuais de fabricación de nanopartículas.

Referencia: ERC-2020-StG-950421

Ir á páxina do proxecto

TraffikGene-Tx é o primeiro proxecto EIC Transition financiado en Galicia polo European Innovation Council. Este proxecto persegue o deseño e validación, a nivel de ensaios preclínicos, de novas estratexias de tratamento baseadas en ARN terapéutico. Máis en concreto, TraffikGene traballará no desenvolvemento de portadores peptídicos modulables e personalizados para a súa aplicación como medicamentos, a partir da súa propia patente de inmunoterapia baseada en ARN. Os produtos resultantes prevén un potencial alcance de millóns de pacientes e unha redución dos custos de atención médica.

Institución financiadora: The European Innovation Council (EIC)

Referencia: HORIZON-EIC-2022-TRANSITION-01-101113110

Ir á páxina do proxecto