O CINBIO participa no proxecto europeo IN-ARMOR para tratar a resistencia antimicrobiana en infeccións gastrointestinais

O Centro de Investigación en Nanomateriais e Biomedicina da Universidade de Vigo (CINBIO), unha iniciativa promovida pola Xunta de Galicia que aglutina os centros do sistema que acreditaron a súa excelencia científica, colabora con sete socios médicos e industriais no proxecto europeo IN-ARMOR (Therapeutic Epigenetic Enhancement of the Innate Immunity to Effectively Combat Antimicrobial Resistance).

Esta iniciativa, financiada ao 100 % pola Unión Europea a través do programa Horizon Europe e coordinado cientificamente pola University of Iceland (Islandia), estuda introducir unha nova clase de indutores do sistema inmunolóxico, capaces de mellorar os mecanismos de defensa microbiana innatos do corpo humano, para combater a resistencia antimicrobiana e reducir a incidencia das 13 infeccións bacterianas máis perigosas do mundo.

IN-ARMOR botou a andar en maio deste ano cunha reunión de lanzamento realizada en Islandia e prolongarase ata finais de abril de 2027, formando parte do consorcio, ademais da Universidade de Vigo, o Karolinska Institute (Suecia), o Servizo Madrileño de Saúde (España), Akthelia Pharmaceuticals (Islandia), Acondicionamiento Tarrasense Associacion (España), University of Jyvaskyla (Finlandia), VibioSphen (Francia), RijkSuniversiteit Groningen (Os Países Baixos), Obelis, SA (Bélxica), Tecnologías Avanzadas Inspiralia (España), Enamine (Ucraína), Biokeralty Research Institute, AIE (España), Betthera, SRO (República Checa), NUVISAN GmbH (Alemaña) e a University of Tampere (Finlandia).

Obxectivos principais do proxecto e achega do CINBIO

O obxectivo principal de IN-ARMOR baséase na optimización dunha plataforma de fármacos xa desenvolvida, empregando o deseño molecular de fármacos asistido por ordenador e modelos in silico que simulan procesos dixestivos utilizando métodos numéricos e computacionais en conxunto cun sistema de administración de fármacos baseado na nanotecnoloxía. A terapia desenvolvida será validada preclinicamente para comprobar a súa seguridade e eficacia in vitro e in vivo, co fin de completar todos os requisitos dos medicamentos en investigación. A perspectiva a longo prazo é mellorar o tratamento antimicrobiano a través dunha plataforma de fármacos que se dirixa epixeneticamente ao sistema inmunolóxico innato para producir a defensa do sistema.