O centro de investigación atlanTTic albergará o principal encontro nacional de ciberseguridade

Entre os días 21 e 23 de xuño, o Centro de Investigación en Tecnoloxías de Telecomunicación da Universidade de Vigo( atlanTTic), que forma parte da Rede CIGUS, será a sede das VIII Xornadas Nacionais de Investigación en Ciberseguridade (XNIC), a principal cita no territorio español arredor da innovación en ciberseguridade. AtlanTTic, xunto co centro tecnolóxico Gradiant e o apoio do Instituto Nacional de Ciberseguridade (INCIBE) son os organizadores do evento, que por primeira vez ten lugar en Galicia.

XNIC é o foro científico-técnico de referencia para a presentación das principais contribucións no ámbito da ciberseguridade. Este congreso, que se realiza anualmente desde 2015, ten como principal obxectivo o intercambio de coñecemento e experiencias neste campo entre a comunidade académica e investigadora e as empresas. A edición de 2023 centrará as súas xornadas en tres eixes principais: investigación, transferencia e formación en ciberseguridade.

AtlanTTic desenvolve a súa actividade científica e de transferencia de coñecemento no ámbito das tecnoloxías de telecomunicación e dos servizos dixitais. Na actualidade, conta cun equipo multidisciplinario formado por máis de 150 persoas que contribuíron a consolidar o seu liderado en I+D+i, cun total de 8,4 millóns de euros de ingresos no último ano.

«A ciberseguridade forma parte da identidade de atlanTTic, desde a súa fundación en 2010. O noso centro executou 27 proxectos (8 europeos) neste ámbito, transferiu o coñecemento xerado ao tecido económico impulsando a súa competitividade e levando con éxito os seus resultados ao mercado, situándose como referentes internacionais nas últimas tecnoloxías en ciberseguridade», afirma Martín Chamas Nistal, director de atlanTTic.

As xornadas realizaranse coa colaboración da Axencia para a Modernización Tecnolóxica de Galicia (AMTEGA), o Nodo Galego de Ciberseguridade (Ciber.gal), a Rede de Excelencia Nacional de Investigación en Ciberseguridade (RENIC), Optar Solutions, ViewNext e a Cátedra R en Ciberseguridade.