O CiMUS lidera a plataforma Innopharma que incrementa a capacidade para o descubrimento e desenvolvemento de fármacos

Mabel Louza e Ángel Carracedo, investigadores do CiMUS, centro que pertence á Rede CIGUS, unha iniciativa promovida pola Xunta de Galicia que aglutina os centros do sistema que acreditaron a súa excelencia científica, lideran desde o seu centro de investigación a plataforma de descubrimento de fármacos: Innopharma. Este proxecto incrementa a capacidade para o descubrimento e o desenvolvemento de fármacos dentro de Galicia, ademais de gañar competitividade internacional.

«Con este financiamento, a plataforma Innopharma poderá continuar cumprindo co seu obxectivo de contribuír a que novos fármacos cheguen aos pacientes, ofrecéndolles aos grupos de investigación biomédica do sistema universitario de Galicia e dos institutos de investigación sanitaria, así como á comunidade científica en xeral, o seu apoio na xeración de produtos e servizos orientados á saúde», explicou Mabel Louza, unha das investigadoras que lidera esta plataforma desde o CiMUS.

Este fito foi posible a través da dotación de cinco millóns de euros por parte da Axencia Galega de Innovación da Xunta de Galicia nos últimos tres anos a través do Fondo REACT-UE dentro do Programa Operativo FEDER Galicia 2014-2020.

Aumentar a competitividade do sector

Ademais de apoiar os equipos de investigación biomédica das universidades de Galicia e institutos de investigación sanitaria na creación de produtos e servizos orientados á saúde, Innopharma busca espertar o interese de empresas tractoras e novos profesionais para xerar emprego cualificado, aumentando a competitividade do sector. Actualmente esta plataforma consta dunha infraestrutura de alto rendemento para o cribado de fármacos, con profesionais altamente especializados, e dunha colección de 60 000 moléculas para o desenvolvemento de proxectos neste ámbito. As súas capacidades propiciaron acordos con decenas de centros de investigación e empresas por todo o mundo.