O CITIC lidera un consorcio internacional para crear unha nova xeración de robots autónomos con aplicación en sectores como o agroalimentario, o educativo, a produción industrial e o comercio

O obxectivo principal do proxecto PILLAR-Robots (Purposeful Intrinsically Motivated Lifelong Learning Autonomous Robots), un consorcio internacional liderado desde o CITIC, miembro da Rede CIGUS, e nacido ao amparo do programa Horizonte Europa, é crear robots máis autónomos que resolvan situacións reais no sector agroalimentario, no entretemento educativo, no campo da produción industrial non estruturada e no comercio. Conta cun orzamento total de cerca de cinco millóns de euros, dos cales repercutirán no CITIC máis dun millón.

Intelixencia artificial para o deseño de robots máis humanos

PILLAR-Robots busca desenvolver unha nova xeración de robots dotados dun maior nivel de autonomía. «Estes robots», segundo explica o investigador principal do consorcio, Richard Duro, «poderán determinar os seus propios obxectivos e establecer as súas propias estratexias, aproveitando creativamente a experiencia adquirida durante a súa vida para satisfacer os desexos dos seus deseñadores (usuarios humanos en aplicacións da vida real). Con este fin, o proxecto porá en práctica o concepto de propósito, extraído das ciencias cognitivas, para aumentar a autonomía e a independencia do dominio dos robots durante a aprendizaxe».

Os propósitos guiarán a adquisición de coñecementos e habilidades que son realmente relevantes para operar en situacións reais. O proxecto desenvolverá, por unha parte, algoritmos para a adquisición de propósitos, co obxecto de nesgar os sistemas de percepción, motivacionais e de decisión da arquitectura cognitiva desenvolvida para os robots cara a eses propósitos. Por outra, busca establecer estratexias para a aprendizaxe autónoma de representacións, habilidades e modelos que permitirán as decisións que eventualmente leven a alcanzar propósitos. Isto inclúe decisións sobre o que hai que aprender e en que secuencia.

«Así, PILLAR-Robots», asegura o investigador do CITIC, «porá en práctica e validará demostradores da chamada aprendizaxe aberta (en situacións non previstas durante o deseño dos robots) utilizando a arquitectura cognitiva intrinsecamente motivada que se desenvolverá durante o proxecto e todas as estratexias adicionais relacionadas co propósito. Estas implementacións realizaranse en tres campos de aplicación diferentes, caracterizados por distintos tipos e niveis de variabilidade e incerteza: o agroalimentario, o do entretemento educativo e no campo da produción industrial non estruturada e o do comercio».

Investigación de vangarda en Europa

Para a realización deste traballo creouse un consorcio liderado polo Grupo Integrado de Enxeñería (GIE) que dirixe Richard Duro, como parte dun equipo do CITIC da UDC, e no que colaboran equipos de gran prestixio do CNR (Consiglio Nazionale delle Ricerche) italiano, a Universidade da Sorbona de París, o centro de investigación Athina de Las atiene, AI2Life SRL, empresa especializada en aplicacións de intelixencia artificial italiana e PAL Robotics, un dos grandes fabricantes de robots de servizo de Europa, situado en España. Esta investigación vangardista é exemplo da calidade e impacto de investigación acreditada pola Xunta de Galicia a través da Rede CIGUS.