O CITIUS reúne a científicos e empresas de novo para «ensinarlle» á IA como explicarse

O CITIUS, que forma parte da Rede CIGUS, a cal integra aqueles centros cunha calidade e un impacto da súa investigación foron acreditados pola Xunta de Galicia, promove un novo evento internacional que se realizará do 15 ao 16 de decembro en Utrecht (Países Baixos) e que reunirá de novo profesionais do mundo académico e da industria para debater sobre como avaliar a calidade dos algoritmos nunha área de investigación emerxente de vangarda coñecida como intelixencia artificial explicable (XAI), un campo de estudo que se enfronta ao reto de facer que os sistemas de IA se expliquen por si mesmos.

Científicos de diferentes universidades europeas de Reino Unido (Aberdeen), Irlanda (Dublín) e Holanda (Tilburg, Utrecht), xunto con representantes da industria (como Philips ou Trivago), compartirán as súas experiencias con estudantes de doutoramento no marco da Rede europea de formación NL4XAI (Interactive Natural Language Technologies for Explainable Artificial Intelligence). Un proxecto de investigación financiado polo programa Horizonte 2020 da Unión Europea, que ten como obxectivo formar a primeira xeración de expertos no campo da intelixencia artificial explicable ao longo do continente europeo.

Evento de formación sobre avaliación da calidade

Estes 11 estudantes de doutoramento (tamén coñecidos como Early-Stage-Researchers [ESR]) son o núcleo do proxecto e terán que enfrontarse ao reto de facer que os sistemas de intelixencia artificial se expliquen a si mesmos, para lograr un mellor uso destas técnicas emerxentes.

Fundamentalmente, ao longo do evento que terá lugar o próximo mes, os estudantes tamén recibirán experiencia práctica co deseño de experimentos de avaliación. Un tema central será a experiencia amplamente divulgada en ciencias experimentais de que os experimentos poden ser extremadamente difíciles de replicar; por exemplo, porque faltan detalles cruciais nos artigos de investigación nos que se informan os experimentos ou debido a problemas coas estatísticas.

Os estudantes obterán experiencia identificando estes problemas en estudos existentes, aprendendo a traballar dunha maneira que garanta a replicabilidade dos estudos de avaliación que realizarán no resto do seu proxecto de doutoramento. As inscricións e mais información do evento están dispoñibles no sitio web oficial de NL4XAI Training Days.

Rede de formación H2020

NL4XAI está financiado polo programa de investigación e innovación Horizonte 2020, a través dunha bolsa Marie Skłodowska-Curie, no marco da aposta da Unión Europea pola intelixencia artificial explicable. O equipo de investigación da Rede CIGUS forma parte do Centro de Investigación en Tecnoloxía Intelixente da Universidade de Santiago de Compostela (CiTIUS-USC), dirixido por Senén Barro. NL4XAI é unha rede conxunta de investigación académico-industrial que reúne a 19 beneficiarios e socios de seis países europeos diferentes (Francia, Malta, Polonia, España, Países Baixos e Reino Unido). Os socios corresponden a dúas institucións nacionais de investigación (IIIA-CSIC, CNRS), dez universidades (Universidade de Aberdeen, Universidade de Dundee, L-Universitá ta’ Malta, Universidade Tecnolóxica de Delft, Universidade de Utrecht, Universidade de Twente, Universidade Tecnolóxica de Varsovia, Universidade de Lorena, Universidade de Santiago de Compostela, Universidade Autónoma de Barcelona, Universidade de Maastricht) e seis empresas privadas (Indra, Accenture, Orange, Wizenoze, Arria, InfoSupport).