O investigador do CICA Daniel Nieto presenta en Seattle a bioimpresora 3D destinada a revolucionar a enxeñería de tecidos

O reputado investigador Daniel Nieto do CICA, que forma parte da Rede CIGUS, unha iniciativa promovida pola Xunta de Galicia que aglutina os centros do sistema que acreditaron a súa excelencia científica, viaxou este xuño a Seattle para participar no sétimo congreso mundial da Sociedade Internacional de Enxeñería de Tecidos e Medicina Rexenerativa (TERMIS). A organización ten a misión de levar os avances neste campo a todo o mundo xerando coñecementos para mellorar a evolución de pacientes no ámbito global.

Esta cita recolle os máis destacados talentos en enxeñería de tecidos, entre os que se atopa Daniel Nieto e o seu equipo do laboratorio Advanced Biofab. En colaboración coa compañía de biofabricación 3D Healthbiolux presentaron unha tecnoloxía avanzada de multimaterial para crear estruturas de alta resolución para aplicacións médicas.

Daniel Nieto incorporouse na primavera de 2024 ao CICA e trouxo consigo cinco liñas de investigación punteiras que van desde a biofabricación avanzada para sistemas de enxeñería vivos ou a biofabricación para enxeñería de órganos e tecidos ata a liña de investigación baseada en HOTB para a bioimpresión óptica holográfica por pinzas. Estas liñas tamén abordan investigacións complexas como o desenvolvemento de microtecidos e tumores en liña coa fisioloxía deses tecidos para usarse no estudo de patoloxías e cancro.

Este ambicioso equipo traballou en colaboración con Healthbiolux, unha compañía do sector enfocada en solucións para a bioimpresión de microtecidos vascularizados e órganos, para desenvolver unha nova tecnoloxía multimaterial que está destinada a revolucionar a enxeñería de tecidos creando estruturas de alta resolución que terán amplas aplicacións médicas. Esta tecnoloxía representa un avance moi significativo cara á fabricación personalizada de tecidos, abrindo novas posibilidades no tratamento de enfermidades e lesións.