O investigador do CRETUS José Manuel Sabucedo incorpórase á Academia de Psicología de España

José Manuel Sabucedo, profesor e investigador do CRETUS, centro que pertence á Rede CIGUS, unha iniciativa promovida pola Xunta de Galicia que aglutina os centros do sistema que acreditaron a súa excelencia científica, ingresou hoxe na Academia Española de Psicoloxía, cunha intervención sobre “Psicoloxía da política” na que abordou a aparición do extremismo en contextos democráticos e os seus efectos, como os comportamentos grupais poden xerar condutas antidemocráticas, e como a psicoloxía social pode contribuír a analizar e, no seu caso, axudar a previr consecuencias non desexadas.

O catedrático do Departamento de Psicoloxía Social, Básica e Metodolóxica da USC foi elixido por unanimidade como académico e ocupará o posto 43 da Academia, que recoñece así non só a súa traxectoria académica senón tamén a súa contribución ao desenvolvemento da Psicoloxía como iniciador da Psicoloxía Política en España e impulsor desta área en Latinoamérica. José Manuel é membro destacado da Sociedade Internacional de Psicoloxía Social, promotor e primeiro presidente da Sociedade Científica Española de Psicoloxía Social e editor da Revista de Psicoloxía Social. No ámbito académico, foi o primeiro Decano da Facultade de Psicoloxía da USC e da Conferencia Española de Decanos de Psicoloxía.