Os centros CIGUS reciben nove millóns de euros de financiamento por parte da Xunta

A Xunta, a través da Consellería de Cultura, Educación, Formación Profesional e Universidades, asinou senllos acordos cos reitores das tres universidades públicas galegas para o financiamento dos centros de investigación do Sistema Universitario de Galicia (CIGUS) que suman cerca de nove millóns de euros.

O acordo beneficiou os oito centros que contan co selo CIGUS, que recoñece a calidade e o impacto da súa investigación: o Centro de Investigación en Tecnoloxías da Información e das Comunicacións (CITIC) na Universidade da Coruña; o Centro Singular de Investigación en Química Biolóxica e Materiais Moleculares (CiQUS), o Centro de Investigación en Medicina Molecular (CiMUS), o Centro de Investigación en Tecnoloxías Intelixentes (CiTIUS) e o Instituto Galego de Física de Altas Enerxías (IGFAE) na Universidade de Santiago de Compostela; e o Centro de Investigación en Tecnoloxías de Telecomunicacións (atlanTTic), o Centro de Investigacións Biomédicas (CINBIO) e o Centro de Investigacións Mariñas (CIM) na Universidade de Vigo.

O conselleiro de Cultura, Educación, Formación Profesional e Universidades, Román Rodríguez, explicou que este financiamento está destinado a axudar a manter a actividade investigadora dos centros e facer posible que continúen ampliando a súa base de talento e posicionándose como institucións investigadoras de referencia.

O financiamento responde aos resultados favorables do proceso de avaliación do rendemento destes centros realizado en 2022. Esta avaliación foi levada a cabo por unha comisión de expertos externos ao Sistema Universitario de Galicia (SUG), que analizaron, a través da documentación facilitada polos centros, a evolución destes en relación con tres ámbitos clave: organización e goberno, calidade da investigación e relevancia para a sociedade.

Ademais da análise da documentación, a comisión avaliadora visitou as instalacións de cada centro e reuniuse coa súa dirección científica para coñecer de primeira man a súa situación actual e as súas perspectivas de futuro.

Esta contía de subvención segue a liña do que os centros viñan recibindo anualmente, pero calculada para dez meses, ata que se publique a nova convocatoria de avaliación e concesión de axudas en 2023.