Os tres centros da rede CIGUS da Universidade de Vigo captan preto de 2 millóns de euros do Plan Nacional

Dos 40 proxectos de investigación da Universidade de Vigo que obtiveron financiamento procedente do Plan Nacional, 13 están liderados por persoal docente e investigador adscritos aos tres centros CIGUS da Universidade de Vigo: o Centro de Investigación en Nanomateriais e Biomedicina (CINBIO), o Centro de Investigación en Tecnoloxías de Telecomunicación (atlanTTic) e o Centro de Investigación Mariña (CIM). Todos eles pertencen á Rede CIGUS, unha iniciativa promovida pola Xunta de Galicia que agrupa os centros do sistema que acreditaron a súa excelencia científica. Entre os tres, captan preto de 2 millóns de euros. Nesta ocasión, o CINBIO obtivo cinco proxectos e 844.000 euros. 

O proxecto que nesta convocatoria obtivo maior financiamento busca desenvolver estratexias de vangarda para a monitorización continua “in situ” de antibióticos en contornas acuáticas. Liderado polo director do CINBIO, Miguel Ángel Correa, e financiado con 281.250 euros, o proxecto aborda as limitacións dos métodos actuais para aliñarse coas prioridades globais de saúde dirixidas a combater a contaminación por antibióticos e, consecuentemente, a coñecida como resistencia antimicrobiana (RAM), un problema que, só en 2019, se estimou estaba vinculado con preto de 4,95 millóns de mortes.