Senén Varro, director do CiTIUS, membro do Consello Científico do Real Instituto Elcano

Senén Varro, catedrático de Ciencia da Computación e Intelixencia artificial e director do Centro singular de Investigación en Tecnoloxías Intelixentes (CiTIUS) da Universidade de Santiago de Compostela, pertencente á Rede CIGUS, foi designado membro do Consello Científico do Real Instituto Elcano. Trátase dun órgano consultivo cuxo obxectivo principal é o de fortalecer e multiplicar a capacidade de análise e o impacto do Instituto Elcano sobre a comunidade académica, as redes de think tanks e a sociedade no seu conxunto. O director do centro ingresou na institución xunto a María Loureiro, catedrática de Economía na Universidade de Santiago de Compostela.

Na composición deste órgano participan de maneira paritaria arredor de cen persoas procedentes de catro bloques temáticos: think tanks globais, investigadores e policy makers, académica e académicos de América Latina e embaixadores e embaixadoras españois en activo. Os seus integrantes están asignados a cada un dos dez eixes da axenda de investigación do instituto, representando as últimas xeracións de persoal investigador con carácter global. Como explica o profesor Senén Varro, o Real Instituto Elcano «é o principal think tank de España e un dos máis relevantes de Europa». O Consello Científico será o órgano internacional consultivo de Elcano, en particular no contexto da investigación que o instituto realiza. En opinión da profesora María Loureiro, os retos deste órgano «están relacionados coa coordinación entre as distintas áreas para producir información útil e de carácter social, que permita o asesoramento especializado e imparcial en temas de actualidade relevantes para España».

No conxunto dos dez eixes da axenda de investigación de Elcano, Senén Varro estará particularmente implicado no de tecnoloxía e transformacións económicas. «O impacto das tecnoloxías máis transformadoras, singularmente as TIC, non só transcende fronteiras, senón que globaliza as sociedades e as economías do mundo», explica o director do CiTIUS. Na súa opinión, a coñecida frase «pensa globalmente, actúa localmente» «faise especialmente pertinente neste caso e será, sen dúbida, un dos retos de Elcano, ao que espero contribuír dun modo relevante». Para explicalo, Barro apela ao feito de que os impactos locais destas tecnoloxías «son enormes: afectan ao emprego, á súa automatización, á educación, á saúde… e son, de modo espontáneo, amplificadoras de desigualdades, polo que non podemos asistir impasibles ao seu desenvolvemento e aplicación».