Un estudo do CiQUS sinala os lípidos en sangue como potenciais biomarcadores de covid persistente

Un estudo liderado pola investigadora Rebeca García Fandiño e con Pablo F. Garrido como autor principal, do Centro Singular de Investigación en Química Biolóxica e Materiais Moleculares da USC (CiQUS), que pertence á Rede CIGUS, unha iniciativa promovida pola Xunta de Galicia que aglutina os centros do sistema que acreditaron a súa excelencia científica, ofrece luz sobre os cambios nos lípidos sanguíneos de pacientes con covid persistente.

A investigación supón un avance na comprensión destas secuelas e abre a porta a mellorar o seu tratamento. Os expertos analizaron o plasma de 147 pacientes con covid persistente. Utilizando técnicas delipidómicas, estudaron un espectro de case 400 lípidos polares distintos. A partir de aí, recorreron a técnicas avanzadas de minería de datos e aprendizaxe automática para desenvolver modelos de clasificación precisos que distinguen entre pacientes sintomáticos e asintomáticos de covid persistente.

A análise revelou alteracións específicas relacionadas coa inflamación e a resposta inmunolóxica continua, ofrecendo unha nova perspectiva sobre a natureza persistente da covid. Ademais, algúns destes lípidos foron identificados como potenciais biomarcadores, o que permitiría levar a cabo diagnósticos máis precisos e desenvolver tratamentos específicos para esta enfermidade.

O descubrimento, publicado recentemente en Journal of Infection and Public Health, foi posible grazas á colaboración entre médicos e investigadores de distintos perfís. O proxecto reuniu a expertos do CiQUS, da Facultade de Física da Universidade de Santiago de Compostela, do Complexo Hospitalario Universitario de Santiago (CHUS), da Universidade de Córdoba e da Universidade do País Vasco. A loita contra as infeccións víricas, como a provocada polo SARS-CoV-2, a través do descubrimento de novas estratexias de diagnóstico, constitúe unha das prioridades científicas do CiQUS. O equipo da Dra. García Fandiño está especializado en aplicar técnicas computacionais a explorar a estrutura e a función das membranas lipídicas como diana de interacción con biomoléculas.